छातीत का? धडधडते?

 *_आजची माहिती_*

📒 *_छातीत का धडधडते?_* 📒

***************************

_छातीत डाव्या बाजूला हात लावल्यास हृदयाचे ठोके जाणवतात. हे ठोके स्टेथोस्कोपने स्पष्ट ऐकू येतात. एरवी हृदयाचे ठोके आपल्या दैनंदिन कामात जाणवत नाहीत. श्रमाची कामे केल्यावर, खेळल्यावर, धावल्यावर, भीती वाटल्यावर थोडावेळ धडधडते, श्वसनवेग वाढतो। शरीराची ऑक्सिजनची मागणी वाढल्यामुळे असे होते. काही वेळातच श्वसनाची गती, हृदयाचे ठोके पूर्ववत होतात. हृदयाच्या कार्याची होणारी अवाजवी जाणीव म्हणजे छातीत धडधडणे (Palpitation), असे म्हणतात._

     _हृदयाच्या कार्यात काही बिघाड असल्यास किंवा एखाद्या वेळेस तणावग्रस्त मानसिकता असेल तर छातीत धडधडते. रक्तक्षय, बेरीबेरी, हृदयाच्या झडपांचे आजार, हृदयातले कर्णिकांचे वाढलेले वा गतिमान ठोके किंवा नाडीचा वाढलेला दर, तणावग्रस्त मन, काही प्रकारचे कर्करोग या सर्वांमध्ये छातीत धडधडते. छातीत धडधडणे हा रोग नाही, ते रोगांचे लक्षण असू शकते. त्यामुळे त्याचे कारण शोधून त्या रोगावर उपचार केल्यास हा त्रास कमी होतो. साधारणतः भीती वाटल्यावर, खेळल्यावर, दचकल्यास तेवढ्यापुरते छातीत धडधडते. अशा धडधडण्याची काळजी करण्याची गरज नाही. ही धडधड थोड्याच वेळात कमी होते._

*~~~~~~~~~~~~~~~~~~*

*_संकलन : गजानन गोपेवाड_*

*~~~~~~~~~~~~~~~~~~~~~~~~~*

*_डॉ.जगन्नाथ दीक्षित, डाॅ.अंजली दीक्षित_*

_यांच्या 'मेडिकल जनरल नॉलेज' या पुस्तकातून_